لما اتولد الرب يسوع في بيت لحم .. في عهد الملك هيرودس.. جم مجموعة من المجوس اللي هما كهنة و علماء فلك و سألوا ..  فين الملك إللى لسة مولود ؟  .. لأننا شفنا نجمه سطع في الشرق .. و جينا عشان نسجد له .. لما هيرودس سمع الخبر ده .. قلق جداً  .. و جمع كل رجال الدين إللى فى المدينة و سألهم ..  فين هيتولد المخلص الموعود بيه ؟  فقالوا له   .. النبوات بتقول هيتولد في بيت لحم  .. هيرودس جاب المجوس في السر و قال لهم  .. روحوا دوروا عليه.. و لما تلاقوه قولوا لي لقيتوه فين .. عشان انا كمان اروح اسجد له.. و لما خرجوا من عنده .. لقوا نفس النجم ماشي قدامهم .. لحد ما جه و وقف فوق بيت لحم اللي اتولد فيه الرب يسوع.. ففرحوا جداً وسجدوا قدامه ..  و قدموا له هدايا .. دهب و بخور و مر.. و بعدين جالهم تحذير في حلم .. إنهم لازم يرجعوا من سكة تانيه .. و جه الملاك ليوسف فى حلم و قال له  .. قوم خد  يسوع و أمه و انزل علي مصر .. لان الملك هيرودس عايز يقتل الطفل.. و اقعد هناك لحد ما أقولك ترجع امتى .. عشان تتم النبوة اللي بتقول  .. من مصر دعوت ابني  .. و لما عرف هيرودس ان المجوس خدعوه ..  اتغاظ جداً .. و أمر بدبح كل الأطفال اللي عمرهم اقل من سنتين ..  و بعد كذا سنة .. هيرودس مات .. جه الملاك ليوسف في حلم و قال له ..  الملك هيرودس مات .. دلوقتى تقدر ترجع ..  فأخد يسوع و أمه العدرا مريم و رجع.. لكن لما عرف ان ابن هيرودس بقى هو الملك خاف.. فجاله الملاك في حلم .. و طلب منه مايرجعش لنفس المدينة.. فراح سكن في قريه بعيدة .. إسمها الناصرة.