الرب يسوع كان زى عادته .. بيعلم في وسط الجموع .. و رجال الدين أعترضوا على إنه قاعد بيتكلم وبياكل مع المرتشين والخطاه .. فالرب يسوع قال لهم مثل: كان فيه راجل عنده ولدين.. الأبن الأصغر قال لأبوه: أديني نصيبي من الميراث .. فأبوه إداله نصيبه من أمواله .. فالولد أخد ميراثه  .. وسافر لمكان بعيد جداً جداً.. وهناك ضيع كل فلوسه من غير حكمة .. وحصلت مجاعة شديدة في المدينة دي.. والولد مامعهوش فلوس .. راح عند واحد بيربي خنازير.. وأشتغل عنده وكان بيتمنى أنه ياكل .. و لو حتى من أكل الخنازير.. لكن حتى ده ما كانش طايله .. وهو قاعد فكر وقال: ابويا عنده خدم كتير وأكل كتير بيفيض منهم .. وأنا بأموت هنا من الجوع.. ها أقوم وأروح له وأقول له : إعتبرني واحد من عبيدك وخدمك.. أنا ما أستحقش أكون أبنك .. وفعلاً الإبن أخد القرار واتحرك.. ومن بعيد جداً شافه أبوه .. وبكل الحنان والحب اللي في قلبه لإبنه.. جري عليه .. وحضنه .. وباسه .. الإبن قاله: أنا ما أستحقش أكون أبنك أنا غلطت في حقك وفى حق ربنا .. الأب أمر خدمه: هاتوله أحلى وأغلى لبس .. ولبسوه جزمة في رجليه وخاتم في ايديه.. وأدبحوا أحسن عجل عندنا.. لأنه لازم نفرح لأن ابني ده .. كأنه كان ميت وعاش من تاني.. وكان تايه وضايع ولقيناه. فبدأوا يحتفلوا ويفرحوا .. والإبن الكبير وهو جاي من بره .. سمع صوت مزيكه وإحتفال كبير .. فسأل الخدامين: هو فيه إيه ؟ فقالوا له: أخوك رجع .. فرفض يدخل البيت.. و لما شاف الأب قال له.. ابنك ده .. ضيع كل فلوسك على الشر.. تدبح له أسمن عجل وتعمل له الحفلة دي كلها.. وأنا اللي قاعد بأخدمك طول السنين اللي فاتت .. وبأعمل كل حاجة انت عايزها.. ما إدتنيش حتى جدي أفرح بيه .. واحتفل مع صحابي .. فرد أبوه: يابني كل اللي عندي ده بتاعك وليك.. بس لازم نفرح بأخوك .. ده كأنه كان ميت وعاش من تاني.. وكان ضايع ولقيناه.