فى يوم .. كان الرب يسوع بيعلم الناس .. كان قاعد في مركب .. والناس كانواعلى الشط .. علشان كلهم يشوفوه ويسمعوه.. وبعد يوم طويل .. الليل إبتدا يليل.. الرب يسوع قال لتلاميذه: يلا بينا نعدي الناحية التانيه من البحيرة .. فركبوا معاه  المركب وسابوا الناس على الشط .. وفى نص الليل .. حصلت عاصفة شديدة جداً.. ومع أن بعض تلاميذ الرب يسوع ..  كانوا صيادين .. لكنهم المرة دي .. خافوا جداً .. لأن الرياح كانت شديدة .. والأمواج عالية جداً .. لدرجة إن الميه ملت المركب.. فجريوا يدوروا على الرب يسوع  .. لقوه نايم في آخر المركب على مخدة.. فصّحوه وقالوا له: اصحى يا معلم  .. احنا بنغرق   .. فصحي الرب يسوع .. و أمر الريح إنها تسكت .. و أمر البحرإنه يهدا .. و فى الحال الريح سكتت .. و البحر هدي خالص  .. الرب يسوع .. بص لتلاميذه وقال لهم: إزاي ما عندكوش إيمان ..؟ إزاي مش واثقين فيّا لحد دلوقتي ؟ ..  فهما خافوا جداً وإترعبوا .. وابتدوا يكلموا بعض ويسألوا نفسهم : مين هو الراجل ده ؟ ..  مين هو يسوع ؟ .. الشخص إللى البحر والريح بيسمعوا كلامه .. مش ممكن يكون إنسان عادى زينا .