بولس وسيلا  .. كملوا من بلد لبلد يبشروا .. لحد ما وصلوا لمدينة تسالونيكي.. وهناك .. بولس كلم ناس كتير عن الرب يسوع .. الرب يسوع اللي بأكلمكم عنه .. هو المخلص الموعود بيه فكتير آمنوا بكلامه.. لكن مجموعة منهم .. أتملوا بالغيرة جداً.. وكونوا عصابة عشان يهجموا علي بولس وسيلا.. وإتجمعوا حوالين بيت واحد من أتباع الرب يسوع .. وأمروه أنه يسلمهم بولس وسيلا.. ولما مالقوهمش أخدوا صاحب البيت ومجموعة من المؤمنين لحكام المدينة.. وإشتكوا أن بولس وسيلا .. سببوا إضطرابات في كل المناطق اللي راحوها.. وجايين هنا يقولوا .. إن فيه ملك أسمه يسوع أعظم من ملكنا.. و رغم إن المسئولين قلقوا من الكلام ده ..  لكنهم سابوا صاحب البيت والمجموعة اللي معاه.. ولما رجعوا .. هرّبوا بولس وسيلا لأنهم خافوا عليهم.. لكن بولس فضل فاكر المؤمنين اللي كانوا في تسالونيكي.. وحاول كذا مرة يزورهم .. لكن مانفعش.. فبعت لهم تيموثاوس تلميذه .. برساله يشجعهم فيها .. ولما رجع تيموثاوس قال لبولس .. إنهم مكملين في إيمانهم بالرب يسوع .. بالرغم من الإضطهاد .. ففرح بولس جداً وكتب لهم رسالة قال فيها : نشكر ربنا جداً من أجل إيمانكم .. وبنصلي من أجلكم بإستمرار.. إن إنتوا قبلتوا رسالة الرب يسوع بفرح وقوة الروح القدس.. بالرغم من الإضطهاد الشديد اللي إتعرضتوا ليه.. وبقيتوا بسبب كدة .. قدوة في الإيمان لكل المؤمنين.. اللي شافوا إزاى إتحولتوا من عبادة الأوثان .. لخدمة الله الحي .. الإله الحقيقي .. وأنكم مشتاقين جداً لمجئ الرب يسوع التاني .. ولما هاييجي هايكون إستقباله .. بهتاف وفرح عظيم.. وكل المؤمنين اللي ماتوا هايقوموا .. واحنا معاهم هنقابل الرب يسوع على السحاب.. وهانعيش معاه في السما حياة أبدية .