بعد حوالي 700 سنة  من نبوة أشعيا النبى ..  إللى قال فيها .. إن فيه عذراء هتحمل و تولد طفل يكون إسمه عمانوئيل .. و معناه الله معانا ..  من وسط كل بنات الدنيا .. بعت ربنا ملاك لبنت عذراء اسمها مريم.. و كانت مخطوبة لواحد اسمه يوسف من نسل داود الملك.. قال لها الملاك: ” سلام يا مريم.. ربنا ميزك و إختارك من بين كل البنات  ” خافت مريم و ارتبكت جداً.. و فكرت فى معنى الكلام ده  .. الملاك قال لها : ” متخافيش يا مريم.. انتي هتبقي حامل و هتجيبي ولد و هتسميه يسوع .. ” مريم ردت ” ازاي هيحصل ده و انا لسةما إتجوزتش” رد عليها الملاك: ” الروح القدس هيسكن فيكي و قوة ربنا هتكون معاكي .. و المولود اللي هيتولد منك هيكون قدوس الله.. ردت مريم و قالت: ” انا تحت امر ربنا ..  و مشيئته فى حياتى أنا راضية بيها .. و لما عرف يوسف ان مريم خطيبته حامل.. زعل جدا و حس بقلق كبير .. و لما كان بيفكر في كده نام  .. و في الحلم .. جاله ملاك و قاله ” يا يوسف.. ماتخافش انك تاخد مريم خطيبتك.. لان اللي هي حامل فيه ده من الروح القدس .. و هي هتجيب ولد و تسميه يسوع .. و معناه الشخص إللى هيخلص العالم من الذنوب  .. صحي يوسف من النوم و نفذ كلام الملاك .. لحد ماولدت العدرا مريم يسوع  .. إللى كان سبب فرح لكل الناس .. و خلاص لجنس البشر .