لوقا 1:22-20 … يوحنا 3:13-17
كان يسوع وأتباعه في المدينة في وقت عيد خروج شعب الله من مصر مع موسى.
واحد من أتباع الرب يسوع أسمه يهوذا.. راح لرؤساء الكهنة .. وعرض عليهم يسهل لهم تسليم الرب يسوع.. ففرحوا جداً.. ووعدوه بفلوس.. ومن وقتها يهوذا كان بيدور على فرصة .. يكون فيها الرب يسوع لوحده.. عشان يقدر يسلمه .. وفي وقت عشا العيد اللي كان بيندبح فيه خروف الفدية.. كان الرب يسوع وأتباعه متجمعين فقال لهم: أنا أشتقت جدا إني آكل عشا العيد معاكم قبل ما أتألم .. لاني المرة الجاية اللي هاحتفل بالعيد دا معاكوا .. هيبقى في السما.
و بعدها .. الرب يسوع قام وخلع روبه.. وجاب فوطة لفها حوالين وسطه.. وصب ميه في طبق.. وغسل رجلين تلاميذه.. ونشفها.. وبعدين لبس روبه مرة تانيه.. ولما قعد قال لتلاميذه: إنتوا بتنادوني يامعلم وياسيد.. وده حقيقي.. وأنا غسلت رجليكوا عشان أعلمكوا .. إن انتوا كمان المفروض تغسلوا رجلين بعض .. وبعدين الرب يسوع أخد الخبز وكسره.. وقال لهم: كلوا .. الخبز ده .. هو جسدي اللي بأديهولكوا .. وأخد كاس النبيت.. وقال لهم: اشربوا منه كلكم.. ده دمي .. المسفوك للعهد الجديد لخلاصكم.. وإعملوا كده دايما .. عشان تفتكروني .. وبعد العشا.. سبحوا الله مع بعض .. و خرجوا للبستان.