أعمال الرسل 2
كان أتباع الرب يسوع مستنيين روح الله .. اللي هو الروح القدس.. زي ما الرب يسوع أمرهم.. وبعد 7 أسابيع .. من قيامة الرب يسوع من الموت.. كان ده وقت عيد ديني مهم جداً.. وكان أتباع الرب يسوع كلهم متجمعين .. بيصلوا في مكان واحد.. وفجأة .. سمعوا صوت زي رياح شديدة ملا المكان كله.. وبعدها .. ظهرت ألسنة شبه النار .. وأستقرت على كـــل واحد منهم.. وإتملى كل أتباع الرب يسوع بالروح القدس.. وإبتدأوا يتكلموا بلغات تانية غير لغتهم.. لأن الروح القدس إداهم القدرة دي.. وكان فيه ناس كتيرة غريبة .. من كـــل حتة في العالم .. مصريين و عرب كانوا موجودين في المدينة عشان يحتفلوا بالعيد.. وسمعوا أتباع الرب يسوع بيتكلموا.. وبدأوا الناس الغريبة يسألوا بعض: أيه ده .. أهل المدينة بيتكلموا بلغتنا .. و بيقولوا لنا عن أمور عظيمة ربنا عملها .. فوقفوا مستغربين.. وحيرانين.. وبدأوا يسألوا بعض: ده معناه أيه .. وكانوا ناس تانيين منهم بيتريقوا عليهم ويقولوا: تلاقيهم سكرانين.. وواحد من أتباع الرب يسوع القريبين منه جداً أسمه بطرس.. وقف وبدأ يكلم الناس: في ناس منكم بيقولوا إننا سكرانين بس ده مش حقيقي.. اللي أنتوا شايفينه ده.. إتنبأ بيه الأنبياء من مئات السنين .. أسمعوا اللي بأقوله.. الله أعلن و أثبت قدام الكل.. إن الرب يسوع هو المخلص الموعود بيه.. الرب يسوع .. إللى عمل معجزات وأمور عظيمة.. وأنتوا قتلتوه وصلبتوه على الصليب.. و الله .. قوّموا من الموت.. وهو دلوقتي في عظمته وقوته في السما.. وزي ماوعدنا .. بعت الروح القدس وملانا بيه.. الناس إتحركت قلوبهم وضمايرهم .. و حسوا بالندم و قالوا لبطرس .. المفروض نعمل أيه .. فبطرس قالهم: لازم كل واحد يتوب عن خطيته.. ويمشي في طريق ربنا.. ويتعمد باسم الرب يسوع المسيح .. عشان تتغفر خطيته.. وبكده.. هاتتملوا بعطية ربنا اللي هي الروح القدس.. والوعد ده ليكم ولولادكم ولكــــل شعوب العالم. و فضل بطرس يتكلم وقت طويل .. ويشجع الناس اللي كانت بتسمعه.. والناس اللي آمنوا بالرب يسوع المسيح … اتعمدوا وانضموا للكنيسة.. وكان عددهم حوالي 3000.. وكانوا مواظبين مع باقي المؤمنين على الصلاه .. وكسر الخبز اللي الرب يسوع وصاهم بيه .. وكل يوم كان الله .. بيضم مؤمنين جداد للكنيسة.