كل يوم كان فيه ناس كتيرة ..  بتصدق وتآمن بالرب يسوع .. وبيتبعوه … وفي يوم من الأيام بطرس و يوحنا كانوا رايحين مكان العبادة علشان يصلوا.. و هناك كان فيه راجل شحات مشلول من يوم ما إتولد.. وكانوا الناس بيشيلوه ويقعدوه عند الباب كل يوم..لما شاف بطرس و يوحنا وهما جايين طلب منهم فلوس.. فرد عليه بطرس وقاله: “ماعنديش فضة ولا دهب.. لكن عندي الأعظم منهم …” فاستغرب الراجل الشحات وبص لهم.. فقال له بطرس: “بإسم الرب يسوع المسيح  … قوم وأمشي …” ومسك بطرس أيده وشده … فقام الراجل ومشي … وفرح … وإتنطط حواليهم… وسبح ربنا على المعجزة اللي حصلت له.. لما شافوه الناس .. إتجمعوا حوالين بطرس ويوحنا وكانوا مستغربين جدا …!!! فبص لهم بطرس وقال لهم: “بتبصوا لنا ليه ؟ وكأن اللي حصل ده بقوتنا .. اللي عمل المعجزة دي وشفا الراجل  .. قوة اسم الرب يسوع اللي إنتوا سلمتوه و صلبتوه .. هو دا اللي يقدر يغفر كل ذنوبكم.. فتعرفوا طريق ربنا”  .. رجال الدين  .. سمعوا و شافوا بطرس و يوحنا بيتكلموا مع الناس .. عن الرب يسوع.. فإتضايقوا و إتغاظوا جدا .. ومسكوهم ورموهم في السجن.. لكن ناس كتيرة صدقوا وآمنوا بالرب يسوع .. وكان عددهم حوالي 5000 راجل.. تاني يوم جابوا بطرس ويوحنا من السجن.. وقالوا لهم: “بأي قوة عملتوا المعجزة دى ؟ وفى الحال إتملى بطرس من الروح القدس وقال لهم: ” الراجل ده إتشفى باسم الرب يسوع..  اللي قام من الموت.. لأن مافيش اسم تاني في الدنيا كلهايقدر يخلص غير اسم الرب يسوع …” ولما شافوا جرأة بطرس ويوحنا … وعرفوا انهم مش متعلمين … استغربوا قوي… ولما عرفوا انهم من اتباع الرب يسوع.. وشافوا الراجل اللي كان مشلول واقف قدامهم.. مقدروش يعملوا حاجة لبطرس ويوحنا.. بس هددوهم وقالوا لهم: ” ماتتكلموش سيرة الرب يسوع ده تاني”  فردوا عليهم بكل جرأة: “إحنا لازم نطيع ربنا أكتر من الناس.. و واجب علينا نتكلم ونشهد بإللي سمعناه وشفناه” فاضطر رجال الدين يسيبوهم.. ولما رجع بطرس ويوحنا لجماعة المؤمنين.. حكوا لهم على اللي حصل.. وقعدوا يصلوا مع بعض بروح واحدة.. وقالوا: ” يا رب  .. ياخالق كل شيء … دافع عن المؤمنين بيك  … وإدينا جرأة عظيمة إننا نتكلم عنّك … ونعمل معجزات عظيمة بإسمك القدوس …  و إسم إبنك الرب يسوع … المخلص الموعود بيه” .. وهما بيصلوا .. المكان إتزلزل وإتملوا من الروح القدس.. وكل يوم .. كانوا بيشتركوا مع بعض في الصلوات ..  و فضلوا عايشين بروح ونفس واحدة فى حياتهم و صلواتهم و حتى فى ممتلكاتهم .. والرب باركهم بركة عظيمة.