وبعد موت حنانيا وسفّيرة، أتباع الرب يسوع القريبين منه اللي كانوا عايشين معاه لما كان على الأرض، إلِّلي هُمّ الرسل؛ عملوا معجزات كتيرة جداً بقوة ومجد الروح القدس العظيم، زي شِفاء المرضى وإخراج الشياطين، وكانوا بيروحوا مكان العبادة ويتجمعوا بإنتظام، وناس تاني كتير إنضموا ليهم, رجالة وستات، فرجال الدين إتغاظوا جداً وقبضوا على الرسل وحطوهم في السجن، لكن ملاك من عند ربنا جه وفتح السجن وخرّجهم وقال لهم: روحوا مكان العبادة وبشروا الناس برسالة الحياة الجديدة عن يسوع المخلص الموعود بيه، ففي الصبح بدري راحوا مكان العبادة وإبتدوا يبشروا الناس هناك، وفي نفس الوقت رجال الدين بعتوا علشان يجيبوهم من السجن ويحاكموهم، لكن لما الحراس راحوا السجن ما لقوهمش، فرجعوا وقالوا: إن السجن كان مقفول، والحراس واقفين على الأبواب، لكن لما فتحنا الأبواب ما لقيناهمش جوّه السجن، ولما رجال الدين سمعواالكلام دا إتضايقوا وإحتاروا جداً، وبعدها شخص تاني جه وقالهم: إن الناس اللي إتسجنوا إمبارح موجودين دلوقتي في مكان العبادة بيبشروا، فبعتوا الحراس مرة تاني وقبضوا عليهم وجابوهم، فكبير رجال الدين زعّق فيهم وقالهم: مش إحنا أمرناكم إنكم ما تتكلموش عن يسوع ده؟ إنتم مُصِرّين تجيبوا دمه في رقبتنا؟ لكن بطرس جاوب: إحنا لازم نطيع وصايا الله مش الناس، الرب يسوع اللي إنتم صلبتوه وقتلتوه قام من الموت، وهو دلوقتي في مكان القوة والكرامة في السما، وهوالمخلص الوحيد للعالم، الله عمل كدة علشان يِدِّي للناس فرصة يتوبوا ويرجعوا عن ذنوبهم فتتغفر، وإحنا شهود على كل ده، وكمان الروح القدس اللي ربنا إداه لكل اللي بيطيعوه شاهد معانا. فرجال الدين لما سمعوا ردهم إتغاظوا جداً، وكانوا عاوزين يقتلوهم كلهم، لكن واحد منهم بيحترموه وليه سلطان عليهم، وكلمته مسموعة جداً ومكانته عالية بينهم، وقف في وسطيهم وأمر إنهم يِخَرّجوا الرسل بره إجتماعهم، وبعد ما خرّجوهم قال لهم: نصيحتي ليكم تسيبوا الناس دول في حالهم، لو همّ بيعلموا التعاليم دي من نفسهم فهايفشلوا وهاتنتهي تعاليمهم، لكن لو تعاليمهم دي من ربنا، مش هاتقدروا تقفوا قدامهم، هاتكونوا بتعملوا عداوة مع ربنا وتقاوموه، فرجال الدين قبلوا نصيحته، وجابوا الرسل وضربوهم وجلدوهم وحذروهم إنهم مايتكلموش مرة تانية عن يسوع، وبعدها طردوهم. فخرجوا الرسل فرحانين إن ربنا إعتبرهم يستاهلوا الضرب والإهانة من أجل إسمه. وإستمروا يبشروا بمواظبة كل يوم في مكان العبادة وفي بيتوهم، إن الرب يسوع المسيح هو المخلص الموعود بيه، اللي جه للأرض علشان يخلص العالم كله من ذنوبه.