Commandment or Tradition script

قادة رجال الدين إتجمّعوا حوالين يسوع وتلاميذه، ولاحظوا إن تلاميذ يسوع مش حريصين ينفذوا التقليد ويغسلوا إيديهم قبل الأكل، لأن التقليد بيقول لازم يغسلوا إيديهم قبل الأكل حتى لو كانت إيديهم نضيفة. وكمان لما يرجعوا من السوق لازم يتطهروا بالميه. فرجال الدين سألوا يسوع: ليه تلاميذك مش بيعملوا زي تقاليدنا؟ بالعكس بياكلوا وإيديهم مش طاهرة؟ فيسوع رد عليهم: إشعيا كان بيتكلم صح لما تنبأ عنكم يا منافقين من أكتر من 500 سنة. زي ما مكتوب: إن الشعب ده بيحترمني بالكلام بس، لكن قلوبهم بعيدة عني جداً. بيتصرفوا كإنهم بيعبدوني لكن مش بإخلاص حقيقي. تعاليمهم مجرد بِدَع من دماغهم، سابوا وصايا ربنا ومشيوا ورا تقاليد الناس.  ويسوع كمّل وقال لهم: إنتوا إبتدعتوا طريق على مزاجكم وسيبتوا وصايا الله وضلّيتوا ورا عادات وتقاليد البشر. فمثلاً موسى النبي قال لكم: أكرم أباك وأمك؛ وكل اللي يهين أبوه أو أمه لازم يموت، لكنكم بتلفّوا وتدوروا حوالين الوصية، فبدل ما يساعد الإبن أبوه وأمه؛ يقدم المساعدة لبيت ربنا، وبسبب كدا بيحرم أبوه وأمه من مساعدته ليهم. وبكده خليتوا وصية ربنا مالهاش قيمة، واتمسّكتوا بعادات وتقاليد متوارثة إبتدعتوها لمصالحكم. وعملتوا كده في وصايا كتير من وصايا الله. ويسوع دعا جماهير الناس وقال لهم: إسمعوا كلامي وإفهموه كويس كلكم، مش اللي بيدخل فمّ الإنسان بينجسه، لكن اللي بيخرج من الإنسان بينجسه. ودي النجاسة الحقيقية. وبعد ما الناس مشيوا؛ تلاميذه سألوه: إحنا مش فاهمين! ممكن تفهّمنا بوضوح. فرد يسوع عليهم: إنتوا ليه مش عاوزين تفهموا؟ مش قادرين تشوفوا إن اللي بياكله الإنسان بيدخل لمعدته ويستفيد منه والباقي بيخرج، ودا اللي بينجس الإنسان، لكن من داخل الإنسان وقلبه بتخرج الأفكار الشريرة والشهوة الجنسية والسرقة … القتل … الزنى … الطمع … الكره … والرياء. الخداع والمكر والكذب والقبح والحسد والنميمة؛ الكبرياء والعند والحماقة. كل ده بيخرج من داخل الإنسان؛ وده اللي فعلاً بينجسه.