30-60-100 script

رة تانية يسوع كان بيعلم على شاطئ البحيرة، وجمهور كثير إتجمعوا حواليه، فراح قعد في المركب والناس فضلوا على الشاطئ، وكان بيعلمهم بأمثال كثير، وده مثل منهم، إسمعوا: فلاح راح يزرع، وهو بيرمي البذور، شوية منهم وقعوا على الطريق فجت الطيور وأكلتهم، وبعض البذور وقعت على أرض تحتها حجارة، فالبذور نبتت بسرعة لكن جذورها ملقتش عمق، فالنباتات نشفت وإتحرقت من حرارة الشمس وماتت، وبعض البذور وقعت وسط الأشواك فخنقت النباتات اللي لسة مُنَبْتة فماتت. لكن فيه بذور وقعت على الأرض الخصبة، فنبتت وكبرت وحصدت 30، و60، و100 ضعف البذور اللي إتزرعت، فيسوع قال للناس: اللي عنده ودان يسمع ويفهم! ولما يسوع بقى لوحده سألوه تلاميذه القريبين منه وبعض أتباعه: إيه معنى المثل؟ رد يسوع: إنتوا ليكوا تفهموا ملكوت الله، لكن معظم الناس بيعيشوا نبوة إشعيا اللي بتقول: يسمعوا وميفهموش ويبصوا وميشوفوش، لأن قلوبهم إتحجرت، وبيقفلوا عنيهم وبصيرتهم، لكن ناس تانية بيشوفوا ويسمعوا ويفهموا، ويرجعوا ويتوبوا لربنا فيشفي قلوبهم، وياه على الفرح والبركة لأن عيونكم بتشوف وودانكم بتسمع، وأنا بقولكم الحقيقة: إن كتير من الناس والأنبياء؛ إتمنوا يدفعوا أي تمن علشان يشوفوا اللي بتشوفوه ويسمعوا اللي بتسمعوه، لكن مكنش عندهم أي فرصة. فيسوع قالهم: لازم تفهموا معنى المثل؛ ده هايساعدكم تفهموا باقي الأمثال اللي هاقولهالكم. الفلاح اللي بيزرع هو اللي بيبشر بكلمة ربنا للناس، والبذور اللي وقعت على الطريق دول الناس اللي بيسمعوا كلام ربنا؛ وبعد ما يسمعوه؛ في الحال الشيطان بيخطف الكلمة منهم. والبذوراللي وقعت على الأرض الحجرية زي الناس اللي بيسمعوا الكلمة بفرح، لكن علشان معندهمش عمق، فالكلمة بتأثر فيهم لكن لما بيدخلوا في مشاكل وإضطهاد مش بيكملوا مع ربنا. والأرض اللي فيها أشواك هي الناس اللي بيسمعوا كلمة ربنا لكن بسرعة بيتخنقوا بهموم الحياة ومغريات الغنى والشهوات؛ فمش بيثمروا. والبذور اللي وقعت على الأرض الخصبة؛ زي الناس اللي قبلوا كلمة ربنا بفرح؛ وبفهم بيثمروا 30، و60، و100 ضعف اللي بيتزرع فيهم، وبياخدوا رسالة ربنا للناس فبيزيد عدد المؤمنين.